6個精明旅行貼士 有得玩又有得慳
成日可以周圍飛去旅行梗係正啦！但無奈自己budget有限……唔使擔心！呢到有幾個慳錢旅行貼士，等你開心去到旅行之餘又可以慳到錢！淡季先去旅行 由於唔少人要等到公眾假期先有時間去旅行度假，所以如果撞正喺聖誕節、新年同埋暑假呢啲旺季去旅行，使費就自然會貴啲啦！作為精明嘅旅行達人，如果可以避開喺呢啲黃金時間去旅行，就會發現小至紀念品，大至住宿同機票費用，都可以平過旺季好多倍㗎！ 旅行前做足功課 如果你成日都等出發前一分鐘，先臨急上網訂機票同酒店，你會發現佢哋會比平日價錢貴好多！想慳錢窮遊，就記得要提早做好功課喇！你可能會喺搵資料嘅時候意外發現某啲旅行路線係特別抵玩，又或者團購優惠有著數，甚至格價時發現喺唔同網頁訂購嘅服務價錢都可以差好遠！夾夾埋埋，又可以慳返一筆！帶齊旅行用品 如果你出發前執齊要用嘅物品，去到目的地就唔需要再額外買喇！其實旅行目的地物價較低，有無帶齊嘢都唔太重要；但當去到瑞士呢啲物價較高嘅國家，帶齊旅行用品就真係好重要喇！好簡單，一個生活喺高物價城市嘅香港人去越南旅行，自然會覺得當地嘅嘢平，唔介意喺當地消費；相反，如果越南人去到物價高企嘅香港，佢哋自然會傾向喺自己國家準備好晒所有旅行必需品先出發，避免不必要嘅消費！ 入住青年旅館 如果你想節省旅費，又唔介意同其他人共享房間嘅話，青年旅舍就啱你喇！除咗可以慳返昂貴嘅酒店費用，仲有機會識到來自世界各地嘅新朋友添！除咗共享房間，你仲可以享用佢哋嘅廚房同客廳，某啲旅舍仲會提供免費嘅當地遊添！所以，如果你唔抗拒同陌生人共享房間，青年旅舍都係一個性價比高嘅窮遊住宿選擇。 了解當地人買嘢勝地 啱啱到達目的地，唔知邊到shopping或者食飯最抵都好合理嘅，唔好彩仲可能做埋水魚添！但當地人熟悉嘅嘢一定比你多，所以善用同當地人交流嘅機會，了解吓邊到買嘢最平、邊間餐廳性價比高，相信都會幫你慳返唔少。大部份當地人見到有旅客肯入鄉隨俗，相信都會好樂意幫你手！ 善用學生優惠 如果你係學生，或者仲持有有效學生證嘅話，就可以喺提供學生優惠嘅旅遊景點慳返筆喇！你可以喺搭車時享有學生優惠、睇戲或者參觀唔同博物館時用學生價畀錢。如果咁啱去到一個附近有學校嘅地方，好彩嘅話，可能仲會撞正提供學生餐嘅餐廳添！呢啲優惠可能由九五折至半價不等，但都可以幫窮遊嘅你慳返唔少。所以，記得帶埋學生證去旅行，同埋消費前問定相關店舖有無提供學生優惠喇！希望以上嘅慳錢旅行貼士，可以幫到你實踐精明旅行啦！想儲錢計劃喺疫情後去個長旅行？了解一吓彈性極高嘅GoSave 定期存款計劃啦！