信用卡同debit card有咩唔同？
好多人問：究竟 credit card 同 debit card 有咩分別？佢哋除咗外形好似、方便我哋出街消費唔使帶現金之外，兩張卡都可以喺唔同嘅舖頭使用！等我哋話你知兩款卡嘅分別啦！ 1.金錢來源 Credit card同 debit card 最主要嘅分別就係使費嘅來源喇！當你用 credit card 消費時，你所用嘅錢其實係銀行嘅錢，亦即係先使未來錢，就好似問銀行借錢一樣。所以當你開心消費完，你係需要喺特定日期還錢找卡數㗎！好處係就算銀行戶口無錢都可以照碌卡買嘢，不過要承受返遲還卡數嘅風險，如果到因為唔記得準時還款而被銀行罰錢，就得不償失喇！相反地，當你用 debit card 碌卡買嘢，任何消費都會直接喺你嘅核心戶口扣錢，所以記得確保消費前戶口入面有足夠金額啊 ！ 2.消費限額 另一個不同之處就係消費限額喇！頭先提及過用debit card 嘅時候，係直接喺你自己戶口入面扣錢，而且你仲可以自己設定消費限額：設定嘅金額越多、消費限額就越高！而信用卡就係由銀行決定，銀行會根據你嘅信貸記錄、收入，甚至供款負擔比率等因素，去決定你張卡嘅信用額，而你嘅消費限額就取決於你嘅信用額。咁如果想提高消費限額可以點？答案就係就要打電話去銀行要求加大限額，又或者乖乖哋等銀行提高你嘅信用額喇！3.對信貸記錄嘅影響如果選擇用信用卡買嘢就即係問銀行借住錢先，用嘅係未來錢而且有借就有還。唔想令到自己因為信貸記錄差而申請唔到各式各樣嘅貸款，就記得要準時還款喇！原因好簡單，除咗會被罰款、利疊利之外，好多時候我哋申請車貸、房屋按揭等各式各樣嘅貸款前，貸方都會幫你做咗信貸評估先，而差嘅信貸記錄分分鐘會令你申請唔到貸款。就算咁啱好彩借到錢，利息都可能會高啲㗎！ 講到咁，係咪即係話擁有一張 debit card 就係完美之選呢？其實答案都係要睇返用家嘅消費習慣。如果你係一個節制唔到自己消費嘅購物狂，咁擁有一張 debit card 就再適合不過！但如果你想建立一個良好嘅信貸紀錄，咁信用卡就幫到你，不過就記得要喺使用 credit card嘅時候準時找卡數，以免影響日後申請貸款喇！4.回贈獎賞回贈方面，其實credit card同 debit card係不相伯仲㗎！不過優惠嘅多少通常就要視乎唔同銀行嘅優惠政策，如果想攞盡著數，就記得要密切留意相關嘅優惠資訊喇！ 唔知大家睇完呢篇文章，有無了解到 credit card 同 debit card 之間嘅分別呢？記得要了解咗自己嘅消費習慣，先好申請唔同嘅卡啊！