GoSave 嘅機制係點樣 ?

GoSave係一個由人數決定年利率嘅定期存款。我哋會連續有唔同批次嘅GoSave定期存款畀大家參加,每一個批次對開始都有指定日數嘅等待期及指定人數要求,如果係等待期內達到指定人數,GoSave定期存款就會提早開始。我哋用以下例子方便你去理解:假設GoSave定期存款喺第1日下午4點鐘提供畀大家參加,等待期係48小時,而參加人數嘅上限係80人;如果第1日當天已經有80個人參加,咁GoSave 定期存款就會馬上開始,唔使繼續等待;如果去到第3日即係48小時嘅時後都只得79個人參加,咁GoSave 會喺下午4點準時開始。如果你錯過咗呢一個批次,你就可以參加下一個即刻提供畀大家嘅GoSave 定期存款。係等待期間,如果你改變主意亦可以取回資金,但係要最少留低港幣10元,咁同批次客戶最後得到嘅利率係唔會影響到。另外,GoSave定期存款開始後,每人有兩次提款嘅機會而且無任何收費,第一次可以提取任何金額,但第二次只可以提取所有餘下金額,而你嘅提取係唔會影響到其他人。但要記住利息會根據喺到期日未被提取嘅本金金額計算,而你喺到期日前所提取嘅金額係唔會有任何利息。

Was this article helpful?